TEBENNUS

TEBENNUS

Graece Τήβεννος, Togae genus, cui nomen ab Arcade Tebenno, qui primus eam chlamidem induit, cum Ionium sinum ingressus esset, et ab illius loci incolis susceptus; a quo edocti indigenae eôdem modô se vestierunt, et vestem Tebenniam vocârunt, quae postmodum nomine corruptô Tebennus vocata est, Io. Meursius, in Curis Criticis, parte 2. c. 31. ex Dionys. Halicarnasseo, l. 3. Vestitum Timenium ab inventore Timene, qui tamen post corruptô nomine Tibenus dictus sit, habet Artemidorus, Onircerit. l. 2. c. 3. Idem cum Toga vestis genus Dionysio, locô cit. Ρ῾ωμαῖοι μὲν τόγας, Ε῞λληνες δὲ τήβεννον καλοῦσι, Romani certe togas, Graeci quidem Tebennum appellant. Unde apud eundem Τηβέννη περιπόρφυρος idem cum Trabea, quam peregrinae fuisse originis, nec Romanorum in principio propriam, uti nec Tebennum, certum est, vide Thom. Dempster. Paralipom. in Rosin. l. 5. c. 32. Ferrarius vero negat Τήβεννον Trabeam esse, simpliciter Togam interpretandam asserens, de Re vestiaria, l. 2. c. 3. Namque et apud Hesychium, ubi ait, Τήβεννος ῏ειδος περιβολάιου παρὰ Ρ῾ωμαίοις, doctissimus Criticorum περιβόλαιον appellat, quemadmodum Artemidorus voce περιεβάλετο usus est, quod nempe Toga ita iniceretur sive circumiceretur, ut totum corpus involveret. Etymologo Τήβεννος dicitur Regium gestamen: Sed si Romani Reges excipiuntur, nullus exserorum Tyrannorum Togâ usus est, nisi ex dono Populi Romani aut eius imitatione. Male itaque ex Polybio apud Athenaeum id firmare docti conantur; qui Antiochum Epiphanem memorat, depositô Regiô cultu amictum Toga, Forum circumire solitum, πολλάκις δὲ καὶ τὴν Βασιλικην` ἀποθέ μενος ἐςθῆτα τήβενναν ἀναλαβὼν περιῄει τὴν ἀγορὰν. Id enim et praeter morem fuisse, notat Polybius et ad imitationem Romanorum fecisse subicit; καὶ καθίϚας ἐπὶ τὸν ἐλεφάντινον δίφρον κατα τὸ παρὰ Ρ῾ωμάοις ἔθος. Vide eundem Ferrarium, l. 1. c. c. 1. statim ab initio.